BETAWI, JAKARTA, JAKARTE

Orang Betawi, Jakarta, Jakarte
Kira-kira yang pas disebutnye.. orang betawi ape orang jakarta ?, dua duanye boleh, tergantung dimane die mao dipake entu kalimat. Sebutan orang jakarta dipake buat identitas kependudukan, kalu yang disebut betawi, entu yang ada hubungannye ama budaya. Trus gitu tempo dulu, budaya betawi yang pake logat " E " itu cuman sebates  kebayuran lama, rawa belong, kebon jeruk, kemanggisan, slipi, petamburan, tenabang, benhil, kuningan, seputaran buncit raya, kalibata, condet, cawang, kebon nanas, rawamangun, tanjung priuk, kemayoran, cempaka putih, senen, kramat, jatinegara, kebon sirih, pasar baru, dan masih banyak yang laennye. Nah diseputaran atawa yang dipinggiran jakarta namanye kalu orang betawi tengah bilang "betawi ora" yang  logatnye "iya' ". Dengan perkembangan kota yang makin rakus akhirnye orang-orang betawi tengah pade minggir di GUSUR . Nah kalu kita mao peratiin ada bedanye tingkah laku betawi tengah sama betawi ora. Belakangan eni yang banyak kesorot betawi-betawi yang galak-galak, yang laga lagunye udeh kaya jawara. Pelem Si Dul Anak Betawi, bisa ngewakilin gambaran budaya orang betawi, walaupun engga pas betul. Betawi "iye" ama betawi "iya" merupakan proses dari akulturasi budaya dari macem-macem etnis, yang dominan kaya budaya  jawa, sunda, arab, cina, eropa, melayu ditambah lagi pengaruh dari indonesia bagian timur. Jadi engga ada yang namanye asli betawi, kalu mao juga orang-orang keturunan portugis (kampung tugu) yang sejarahnye jelas dari abad ke 16 yang nenek moyangnye becokol disitu. Saya punya pendapat kalu betawi entu adalah "kebudayaan" yang dihasilkan dari proses interaksi budaya macem-macem suku dan bangsa. Wassalam.